У мінулую суботу мы прынялі ўдзел у раённых Дажынках у аг. Кастрычнік у якасці Музея хлеба. У экспазіцыі былі прадстаўлены прадметы з фондаў нашага музея, якія распавядаюць пра гісторыю нараджэння хлеба на тэрыторыі Беларусі. А духмяныя экспанаты перадалі мецэнаты з сельскіх і гарадскіх устаноў культуры і адукацыі. Караваі “Гаспадар”, “Памінальны”, “Прывітальны”, “Вясельны”, “Навасельны”, хлеб “Першы”, “Дахрысціянскі”, Велікодны “Артас”, птушачкі “Буські”, спецыяльна прывезены з Любаншчыны ўнікальны “Жараўскі хлеб”, рэцэпт якога ўнесены ў дзярж.Спіс ГКС, а таксама сімвал жыцця і надзеі – “блакадны хлеб” можна было ўбачыць на нашай лакацыі. І вядома ж трохі інтэрактыву – госці з задавальненнем малолі пшанічную муку з дапамогай сапраўдных жорнаў і частаваліся булачкамі з “хлебнага дрэва”.

Заслаўе, старажытны горад з багатай гісторыяй, расчыніў свае дзверы для ўдзельнікаў і гасцей абласных Дажынак. Сярод шматлікіх творчых калектываў, якія прыбылі на свята ўраджаю, на інтэрактыўнай пляцоўцы «Беларуская хатка» ў этнаграфічным комплексе Гісторыка-культурнага музея-запаведніка «Заслаўе», у гэты дзень дэманстравалі сваё майстэрства і батлеечнікі з Лагойскага гісторыка-краязнаўчага музея імя Канстанціна і Яўстафія Тышкевічаў. Іх яркае прадстаўленне, заснаванае на традыцыях Народнага лялечнага тэатра, стала адным з самых запамінальных момантаў мерапрыемства. Батлейка – гэта не проста лялечны тэатр, гэта жывое ўвасабленне беларускай культуры, яе гісторыі і духоўных каштоўнасцей. Лагойскія артысты здолелі перадаць гледачам атмасферу народных гулянняў, напоўніўшы прадстаўленне вершамі, жартамі, віктарынамі, а таксама салодкімі прызамі.
Гледачы адзначылі, што ўбачылі не проста лялечны тэатр, а жывую, гісторыю сваёй краіны, а таксама падкрэслілі, што гэты від мастацтва – гэта жывая сувязь пакаленняў, гэта душа беларускай зямлі, якая знаходзіць сваё адлюстраванне ў кожным руху лялькі, у кожнай рэпліцы акцёраў.